Kryetari i Komunës së Dragashit, z.Bexhet Xheladini, së bashku me një pjesë të Kabinetit priti sot në takim zëvendëskomandantin e KFOR-it, Gjeneral brigade Federico Bernacca me bashkëpunëtorë nga LMT-ja e KFOR-it Turk, Njësia në Dragash.
Në vizitën e tij të parë në Komunën e Dragashit, zëvendëskomandanti Bernacca u njoftua nga Kryetari Xheladini me një historik të shkurtër të Komunës sonë. Njëherit, Kryetari Xheladini shprehu mirënjohjen dhe falënderimin e tij për mbështetjen e vazhdueshme dhe kontributin e pazëvendësueshëm të KFOR-it në sigurinë e përgjithshme të vendit tonë, duke theksuar gjithashtu edhe bashkëpunimim e frytshëm që LMT-ja e KFOR-it Turk ka me Komunën e Dragashit.
Gjithashtu, Kryetari Xheladini e informoi zëvendëskomandantin e KFOR-it për situatën e krijuar nga vërshimet në Komunën tonë, duke kërkuar që të gjithë ata që kanë mundësi të ofrojnë mbështetjen e tyre për qytetarët e prekur nga këto vërshime, si dhe ta shfrytëzojnë autoritetin e tyre për t’i bërë thirrje Qeverisë dhe organeve qendrore që t’i dalin në krah Komunës së Dragashit për ta tejkaluar këtë gjendje.
Pas përfundimit të takimit, Kryetari Xheladini dhe Gjenerali Bernacca vizituan xhaminë e madhe të fshatit Bresanë, ku u pritën nga imami i fshatit.
