Sot zhvilluam një vizitë zyrtare në Bashkinë e Sarandës, ku së bashku me delegacionin e Komunës së Dragashit u pritëm nga nënkryetarja e Bashkisë së Sarandës, znj. Manjola Nikollo, si dhe nga Drejtoresha e turizmit të kësaj bashkie znj.Erisa Çakalli.
Gjatë takimit, delegacioni ynë prezantoi karakteristikat gjeografike të Komunës së Dragashit, strukturën demografike, organizimin politik dhe institucional, si dhe potencialet tona për zhvillim ekonomik dhe turistik.
Një pjesë e rëndësishme e diskutimit iu kushtua bashkëpunimit në fushën e turizmit, duke theksuar se, ndonëse Saranda është një ndër destinacionet më të njohura bregdetare të Shqipërisë, Komuna e Dragashit ofron një potencial të veçantë për turizëm malor dhe dimëror, veçanërisht përmes dy qendrave tona turistike, Guri i Zi dhe Argjena, kjo e fundit me potencial dhe karakter ndërkombëtar në fushën e skijimit.
Në këtë kuadër, parashtruam edhe kërkesën që Kryetari i Bashkisë së Sarandës, z. Oltion Çaçi, të realizojë një vizitë zyrtare në Komunën e Dragashit në një të ardhme të afërt, me qëllim që të njohë nga afër potencialet tona turistike, kulturore dhe zhvillimore.
Një tjetër çështje me rëndësi ishte ideja e binjakëzimit ndërmjet Komunës së Dragashit dhe Bashkisë së Sarandës. Duke pasur parasysh se Komuna e Dragashit deri më tani nuk është e binjakëzuar me ndonjë bashki të Shqipërisë, si dhe duke marrë parasysh disa ngjashmëri demografike dhe shoqërore ndërmjet dy territoreve, vlerësojmë se një partneritet i tillë do të krijonte një bazë të mirë për bashkëpunim afatgjatë.
Binjakëzimi do të mundësonte shkëmbimin e përvojave në qeverisjen lokale, në trajtimin dhe përfshirjen e komuniteteve jo-shumicë, në zhvillimin e turizmit, funksionimin e strukturave turistike dhe promovimin e destinacioneve, si dhe në fusha të tjera me interes të përbashkët.
Mikpritësit nga Bashkia e Sarandës shprehën gatishmërinë për të vazhduar komunikimin dhe bashkëpunimin ndërmjet dy institucioneve, ndërsa u shprehën të gatshëm që çështjen e binjakëzimit ndërmjet dy njësive vendore ta përcjellin dhe ta trajtojnë në strukturat përkatëse të Bashkisë.
Gjithashtu, përfaqësuesit e Bashkisë së Sarandës shprehën gatishmërinë për të marrë pjesë në Festivalin Ballkanik “Opoja Vallëzon”, duke e konsideruar këtë një mundësi të mirë për forcimin e lidhjeve kulturore dhe miqësore ndërmjet dy komuniteteve.
Ky takim ishte një hap i rëndësishëm drejt krijimit të një ure të re bashkëpunimi ndërmjet Komunës së Dragashit dhe Bashkisë së Sarandës, me synim shkëmbimin e përvojave, promovimin e turizmit dhe forcimin e marrëdhënieve institucionale e njerëzore.
Me respekt,
Bexhet Xheladini
Kryetar i Komunës së Dragashit
Së bashku me pjesëtarët e tjerë të delegacionit
