Nesër është dita madhështore e festës së Kurban Bajramit, e cila shpreh gatishmërinë dhe përkushtimin e besimtarit për sakrificë e flijim vetëm për hir të Allahut.
Festa e Kurban – Bajramit na rikujton në mënyrën më të mirë mësimet hyjnore për unitet, solidaritet, bamirësi e sakrificë, parime këto që bëjnë njerëzimin të reflektojë në të mirën dhe në atë që e do Krijuesi i gjithësisë.
Situata e përgjithshme me pandeminë Covid -19, si asnjëherë me parë na obligon që edhe gjatë këtyre ditëve festive, t’u përmbahemi protokolleve të veçanta të aprovuara nga autoritetet kompetente shëndetësore.
Të marrim shembull nga mësimet e profetit Muhamed paqja e Zotit qoftë mbi të ku thoshte: nëse dëgjoni për ndonjë epidemi të murtajës në një vend, mos shkoni atje, nëse ka epidemi në vendin ku ndodheni, mos u largoni, me këtë mesazh dhe lutje për ju më lejoni t’jua uroj festën e Kurban-Bajramit, duke e lutur Allahun për mirëqenie, lumturi dhe shëndet.
