Nën patronatin e Kryetarit Xheladini dhe OVL të UÇK-së në Sharr u organizua Akademi Solemne për nder të 5 Majit – Ditës së Dëshmorëve. Në këtë Akademi morën pjesë familjarë të dëshmorëve, përfaqësues të qeverisjes lokale, veteranë të luftës, përfaqësues të shoqërisë civile, media dhe qytetarë të shumtë.
Në fjalën e tij, Kryetari Xheladini tha se kjo është dita më e lavdishme në historinë e Kosovës. Ne si shtet dhe si shoqëri asnjëherë nuk duhet t’i harrojmë vlerat dhe shembullin e luftës së pakompromis të dëshmorëve tanë për lirinë e atdheut, si dhe të kaluarën tonë të dhimbshme dhe të përgjakshme.
Në këtë akademi kushtuar të rënëve për liri dhe pavarësi, në shenjë respekti për sakrificën dhe kontributin e tyre u nderuan me mirënjohje familjet e dëshmorëve, gra veterane të luftës dhe veteranë të UÇK-së të cilët kanë humbur jetën pas luftës.
Pas programit artistik dhe përmbylljes së Akademisë Solemne, në mënyrë të organizuar u bënë homazhe te shtatorja e Komandantit Legjendar Adem Jashari, Varrezat e Dëshmorëve në Dragash dhe Buqe, si dhe te pllaka përkujtimore e dëshmorit turk Husein Kutlu.
