Nën udhëheqjen e kryesueses Arijeta Skeraj, sot u mbajt Mbledhja III (e tretë e rregullt) për vitin 2024 e Kuvendit të Komunës së Dragashit, ku u diskutuan këto pika të rendit të ditës:
1. Miratimi i Raportit për zbatimin e Planit Komunal për Integritet për vitin 2023;
2. Propozim-vendim për bartjen e mjeteve vetanake të pashpenzuara nga viti 2023 nê vitin 2024; dhe
3. Miratimi i Raportit të Punës së kryetarit dhe organeve ekzekutive të Komunës së Dragashit për vitin 2023, si dhe Plani i Punës së kryetarit dhe organeve ekzekutive për vitin 2024;
Të gjitha pikat e rendit të ditës u miratuan me shumicë votash nga ana e delegatëve të Kuvendit.
Në pikën e parë të rendit të ditës, prezantimin e Raportit për zbatimin e Planit Komunal për Integritet e bëri koordinatori i këtij Plani, z.Fitim Spahiu.
Në pikën e dytë të rendit të ditës u votua për bartjen e mjeteve të pashpenzuara nga viti 2023 në vitin 2024. Prezantimin e materialit e bëri Kryetari Xheladini, i cili sqaroi para delegatëve se mjetet e grumbulluara më tepër në raport me planin e vitit 2023 kapin vlerën prej 90,460.33 euro, të cilat së bashku me mjetet e pashpenzuara nga Fondi 21 dhe 22 përbëjnë një shumë totale prej 229,515.99 euro. Këto mjete do të shpërndahen nëpër programe dhe nënprograme buxhetore të drejtorive komunale, të cilat do të shfrytëzohen për realizimin projekteve të ndryshme gjatë vitit 2024.
Ndërkaq, në pikën e tretë prezantimin e Raportit të Punës për vitin 2023 fillimisht e bëri kryetari i Komunës, z.Bexhet Xheladini. Më pas, secili drejtor raportoi për punën dhe aktivitetet e drejtorive përkatëse për vitin 2023.
Në këtë pikë të rendit të ditës u prezantuan gjithashtu edhe Plani i Punës së kryetarit dhe organeve ekzekutive për vitin 2024.
