Në sallën e Kuvendit Komunal sot u mbajt një ligjëratë vetëdijesuese me maturantet e të gjitha komuniteteve që jetojnë në Komunën e Dragashit. Kjo ligjëratë u organizua nga zyrtarja për Barazi Gjinore, znj.Lindita Kozmaqi Piraj, së bashku me përfaqësuesen nga OJQ “SENSA”, znj.Salmira Usmeni, me rastin e shënimit të Ditës Ndërkombëtare të Vajzës.
Ligjërata kishte për synim vetëdijesimin e vajzave të reja për ballafaqimin me pabarazitë gjinore, si dhe mundësitë e barabarta që duhet të kenë në realizimin e të drejtave të tyre, me fokus të veçantë në profesionet që ato duan dhe zgjedhin t’i ushtrojnë përgjatë jetës së tyre.
