U mbajt akademia solemne në sallën e Kuvendit Komunal në Dragash, për nder të 15 vjetorit të Pavarësisë së Kosovës, ku morën pjesë kryetari i Komunës së Dragashit, z.Bexhet Xheladini me zyrtarë të ekzekutivit komunal, kryesuesi i Kuvendit Komunal, asambleistët e Kuvendit, familjarë të dëshmorëve, përfaqësues të organizatës së veteranëve, përfaqësues fetarë, të sigurisë dhe qytetarë të shumtë.
Kryetari Xheladini uroi të gjithë qytetarët për këtë datë historike, duke përkujtuar dhe shprehur lavdi për të gjithë ata që dhanë jetën e tyre për këtë ditë, si dhe duke falënderuar dhe shprehur nderime për të gjithë ata që në forma të ndryshme sakrifikuan dhe dhanë gjithçka nga vetja për të mbajtur gjallë idealin për liri dhe pavarësi.
“Sot Kosova është shtet i pavarur, është një dhe i pandarë. Për këtë ne duhet të prosperojmë në të gjitha fushat e jetës. Secili nga ne, pa dallim etnie, të angazhohemi për një mirëqenie më të mirë të gjeneratave tona dhe atyre që do të vijnë pas nesh”, tha mes të tjerash Kryetari Xheladini, gjatë fjalimit të tij drejtuar të pranishmëve.
Pas akademisë solemne u bënë homazhe tek shtatorja e Komandanit Legjendar Adem Jashari dhe tek varrezat e dëshmorëve në Dragash dhe Buqe.
Aktivitetet për nder të 17 Shkurtit përfunduan me koncertin e organizuar në Shtëpinë e Kulturës “Abdurrahman Gërdellaj”, ku morën pjesë ShKA “Bresana” dhe këngëtarë të mirënjohur nga të dy komunitetet.
