Në ambientet e Liqenit të bukur të Breznes sot u mbajt Manifestimi “Mirë se erdhët, mërgimtarë!”, i organizuar në kuadër të Agjendës së aktiviteteve për Ditët e Mërgatës, të cilat po mbahen nën patronatin e kryetarit të Komunës, z.Bexhet Xheladini.
Këtë vit, përveç programit artistik me këngë dhe valle me tupana, këtij Manifestimi iu shtua edhe fluturimi me paragllajd mbi Liqenin e Breznes, një aktivitet ky i organizuar së bashku me përfaqësuesit e Federatës Aeronautike të Kosovës.
Fjalimi i plotë i Kryetarit Xheladini:
“Kam kënaqësinë që t’ju uroj mirëseardhje në këtë manifestim të veçantë, tashmë tradicional, i cili organizohet në Liqenin e bukur të Breznes, për të mirëpritur bashkatdhetarët tanë të cilët për çdo vit zgjedhin vendlindjen e tyre të dashur për t’i kaluar pushimet.
Këtë vit, përveç programit artistik, bashkë me dashamirët e paragllajdizmit dhe Federatën Aeronautike të Kosovës jemi kujdesur që të ofrojmë për ju disa çaste spektakulare të këtij sporti ekstrem të fluturimit me paragllajd në qiellin e bukur mbi Brezne. Pika e re e Take Off (TEJKOF) e cila po hapet sot, do ta mbajë emrin e Hizdri Gubetinit, kampionit të disafisht të Kosovës, Shqipërisë, Maqedonisë etj. Njeriu i cili ndër të parët e solli paragllajdizmin në Kosovë dhe e deshi aq shumë këtë sport, duke korrur rezultate të jashtëzakonshme të cilat e çuan Kosovën në vendin e 5-të në botë. Falënderoj djalin e Hizdriut, Almirin, i cili po ndjek hapat e babait të tij dhe po jep kontributin e vet në zhvillimin e sportit të paragllajdizmit në Kosovë.
Të nderuar të pranishëm,
Si qeverisje lokale jemi përpjekur të bëjmë maksimumin dhe po angazhohemi në vazhdimësi për të modernizuar infrastrukturën dhe për ngritur nivelin e mirëqenies së qytetarëve të Komunës sonë.
Për nder të Mërgatës, Qeveria Lokale ka organizuar disa manifestime, si Festivali Ballkanik, Turneu i Futbollit, Manifestimi këtu te Liqeni i Breznes; ka funksionalizuar Rrugën Unazore; ka zgjatur orarin e punës të zyrtarëve për shërbime komunale; ka hapur oborret e shkollave si parkingje pa pagesë; në vazhdimësi po ofrohen shërbime shëndetësore primare dhe sekondare pa pagesë etj.
Në fshatin Brezne nuk do të jetë më problem furnizimi me ujë të pijshëm, falë projektit më të madh kapital të Ujësjellësit për 15 fshatra dhe qytezën e Dragashit, të cilin do ta përfundojmë vitin e ardhshëm. Javën e kaluar kemi nënshkruar kontratën për ndërtimin e Fabrikës së ujit, e cila do të kushtojë diku rreth 900 mijë euro. Gjithashtu, trasimi i rrugës së bjeshkës, kubëzimet e rrugëve lokale, rregullimi i rrjetit të kanalizimit, ndërtimi i Impiantit për ujërat e zeza dhe ndërtimi i parkut te Liqeni, janë vetëm disa nga projektet të cilat tregojnë përkushtimin tonë për ta bërë fshatin Brezne dhe të gjithë fshatrat tjerë vende me kushte të favorshme për një jetë normale dhe me sa më pak sfida.
Të dashur bashkatdhetarë,
Është obligim i yni moral dhe qytetar që, kontributin e dhënë për vendlindjen dhe të afërmit tuaj, sakrificën e pashembullt jashtë atdheut dhe pasqyrimin e vlerave dhe identitetit tonë nëpër botë, t’ua shpërblejmë me punë dhe angazhimn të përditshëm për ta bërë vendin tonë çdo herë e më të mirë.
Duke ju falënderuar pafundësisht për pjesëmarrjen tuaj në këtë Manifestim, uroj që gjatë qëndrimit tuaj në vendlindje të kaloni momente të paharrueshme me miqtë, familjarët dhe të afërmit tuaj! Si institucione lokale do të jemi çdo herë afër jush, që së bashku të angazhohemi për një jetë më të mirë për të gjithë ne.
Ju faleminderit!”
