Sot pata kënaqësinë të marr pjesë në shënimin e Ditës së ShFMU “28 Nëntori” në Bresanë, një institucion që prej dekadash mbetet shtyllë e dijes, identitetit dhe zhvillimit në komunitetin tonë. Kjo ditë merr një domethënie të veçantë pasi përkon me Ditën e Flamurit dhe ngjarjet historike që përfaqësojnë krenarinë dhe sakrificën tonë kombëtare.
Gjatë këtij aktiviteti, u ndieva veçanërisht i privilegjuar të rikthehem si ish-nxënës i kësaj shkolle, e cila ka dhënë dhe vazhdon të japë kuadro të çmuara për Komunën dhe vendin tonë.
Pas programit artistik të përgatitur me shumë përkushtim nga nxënësit, e përcollëm edhe prezantimin e grupit të robotikës dhe pajisjeve elektronike, i cili na kujton se çdo ide e vogël e nxënësve mund të shndërrohet në arritje të mëdha për shkollën dhe komunitetin.
I uroj përzemërsisht për Ditën e Shkollës stafin arsimor dhe të gjithë nxënësit. Komuna e Dragashit mbetet e përkushtuar në mbështetjen e arsimit dhe krijimin e kushteve gjithnjë e më të mira për fëmijët tanë.
