Kryetari i Komunës së Dragashit, Bexhet Xheladini, së bashku me drejtorin e Arsimit, drejtoreshën për Kulturë, Rini dhe Sport dhe pjesëtarë të tjerë kabinetit, pritën sot në takim shefen e Zyrës së UNICEF-it në Kosovë, znj.Nona Zicherman, zyrtaren për Komunikim dhe Partneritet, znj.Dafina Zuna dhe zyrtaren për Rini dhe Adoleshentë, znj.Hanë Ilazi, të shoqëruar nga përfaqësuesi i zyrës së UNICEF-it në Dragash, z.Agon Baxhaku.
Kryetari Xheladini falënderoi partnerët nga UNICEF-i për bashkëpunimin dhe ndihmën e vazhdueshme ndaj Komunës së Dragashit, sa i përket hapjes së Qendrës me Bazë në Komunitet, financimit të stafit, furnizimit me pajisje, ofrimit të qasjes në shërbime cilësore shëndetësore, arsimore, të edukimit dhe shërbimeve të ndryshme sociale për zhvillimin e fëmijëve në fëmijërinë e hershme dhe mbrojtjen e të drejtave të fëmijëve. Me këtë rast u nënshkrua edhe Plani i Përbashkët i Punës për vitin 2023.
Së bashku me përfaqësuesit e UNICEF-it, Kryetari Xheladini vizitoi edhe kompaninë “MEKA”, ku u pritën nga pronari i kësaj kompanie, z.Burim Piraj, me të cilin patën rastin të diskutojnë mbi mundësitë e bashkëpunimit me sektorin privat për realizimin e programeve për angazhimin e të rinjve në punë praktike.
Më pas zyrtarët komunalë me partnerët e UNICEF-it vizituan edhe ShFMU “28 Nëntori” në Bresanë. Gjatë takimit që zhvilluan me mësimdhënës dhe prindër të nxënësve të kësaj shkolle, u fol për projektin e krijimit të Qendrës me Bazë në Komunitet, e cila pritet të krijohet në ambientet e shkollës së re në fshatin Bresanë, e cila qendër do të shërbejë si bazë për t’u shndërruar në çerdhe të fëmijëve në të ardhmen. Qendra e deritashme me bazë në komunitet në qytezën e Dragashit pritet që së shpejti të kthehet në çerdhe për fëmijë.
Komuna e Dragashit mbetet e përkushtuar dhe do të angazhohet maksimalisht në zhvillimin e mirëqenies sociale të qytetarëve të Dragashit, duke u fokusuar veçanërisht tek gratë, fëmijët, të rinjtë dhe grupet e margjinalizuara shoqërore.
