Shefi i Misionit të OSBE-së në Kosovë, Ambasadori Michael Davenport, vizitoi sot Komunën e Dragashit, ku u prit nga udhëheqësit e ekzekutivit dhe legjislativit lokal.
Fillimisht, Ambasadorin Davenport e priti kryesuasja e Kuvendit të Komunës, znj.Arijeta Skeraj, e cila e njoftoi me punën dhe aktivitetet e Kuvendit të Komunës së Dragashit, duke e falënderuar për mbështetjen e OSBE-së ndaj autoriteteve lokale. Në anën tjetër, Ambasadori Davenport e uroi Kryesuesen Skeraj për pozitën e udhëheqëses së legjislativit në Dragash, duke ritheksuar arritjet që ka bërë Komuna e Dragashit në sferën e përmirësimit të pozitës së grave në vendimmarrje.
Më pas, Ambasadori i OSBE-së në Kosovë u prit nga kryetari i Komunës, z.Bexhet Xheladini, i cili shprehu falënderimin e tij për përkrahjen e vazhdueshme të kësaj organizate ndaj institucioneve lokale në Dragash, si dhe për rolin e madh të saj në demokratizimin e proceseve në përgjithësi. Ambasadori Davenport e përgëzoi Kryetarin Xheladini dhe Komunën e Dragashit për progresin e dukshëm që është arritur gjatë viteve të fundit në të gjitha fushat e qeverisjes lokale, me theks të veçantë në rritjen e transparencës komuale, si dhe avancimin e çështjeve gjinore dhe respektimin e të drejtave të komuniteteve joshumicë që jetojnë në Komunën e Dragashit.
Në fund të vizitës së tij, Ambasadori OSBE-së në Kosovë pati një takim me anëtarë të Mekanizmit Komunal Kundër Dhunës në Familje, ky u njoftua nga afër me angazhimin dhe sfidat e këtij mekanizmi në luftën kundër dhunës në familje dhe dhunës me bazë gjinore.
