Sot u mbajt mbledhja e dytë e e Qeverisë Komunale në Dragash, e kryesuar nga kryetari Bexhet Xheladini. Në këtë mbledhje morën pjesë të gjithë krerët e drejtorive komunale, shefi i Zyrës për Komunitete, Zyrtari Kryesor Financiar dhe pjesëtarë të kabinetit të kryetarit. Në rend të ditës për diskutim ishin këto dy pika:
1. Diskutim rreth gjetjes së mundësive për ndihmë për qytetarët e Komunës së Skënderajt, pas situatës së krijuar nga vërshimet e javës së kaluar, dhe
2. Eventuale
Në pikën e parë të rendit të ditës, pas diskutimit dhe propozimeve të ndryshme, u arritën këto konkluzione:
1. Resul Fetahu – nënkryetar i Komunës së Dragashit, dhe Nuhija Tairovci – drejtor i Drejtorisë për Mbrojtje, Shpëtim dhe Shërbime Publike, u caktuan persona përgjegjës që do të merren me çështjet e organizimit dhe aktivitetet që do të zhvillohen për ofrimin e ndihmës për Komunën e Skënderajt,
2. Kryetari i Komunës, Bexhet Xheladini, me një delegacion do të vizitojë brenda javës Komunën e Skënderajt, për të parë nga afër situatën e krijuar pas vërshimeve,
3. Qeveria Komunale do t’i propozojë Kuvendit Komunal në Dragash ndarjen e një shume të caktuar të mjeteve financiare nga kategoria buxhetore e subvebcioneve dhe transfereve për nevojat e qytetarëve të Komunës së Skënderajt,
4. Kryetari i Komunës dhe përgjegjësit e caktuar do të ftojnë në takim përfaqësues të bizneseve, të OJQ-ve, përfaqësues nga dy Këshillat e Bashkësive Islame, përfaqësues nga Kryqi i Kuq dhe Shoqata “Bereqeti”, për të diskutuar gjetjen e mundësive për ndihmë të qytetarëve të Komunës së Skënderajt,
5. T’u bëhet apel qytetarëve të Komunës së Dragashit që, në bazë të mundësive dhe vullnetit të tyre, të kontribuojnë me mjete financiare për t’iu dalë në ndihmë qytetarëve të Komunës së Skënderajt (në foton e postuar më poshtë mund t’i gjeni të dhënat dhe numrat e xhirollogarive ku mund të dërgohen mjete financjare),
Në pikën e dytë të rendit të ditës Kryetari Xheladini informoi pjesëmarrësit për takimin me blegtorët që do të organizohet sot në sallën e Asamblesë Komunale, si dhe për takimin që do ta zhvillojë nesër me përfaqësues të Qeverisë së Kosovës për çështjen e Ujësjellësit.
