Nën kryesimin e kryetarit të Komunës, z.Bexhet Xheladini, sot u mbajt Mbledhja VIII (e tetë) e rregullt e Qeverisë Komunale, ku u diskutuan këto pika të rendit të ditës:
1. Shqyrtimi i Listës së pronave të AKP-së që janë në interes publik për Komunën;
2. Shqyrtimi i kërkesave për dëmet e shkaktuara nga vërshimet; dhe
3. Eventuale.
Në këtë mbledhje ishte i pranishëm edhe kryesuesi i Zyrës Rajonale të AKP-së në Prizren, z.Nexhat Elshani, i cili në pikën e parë të rendit të ditës njoftoi Qeverinë Komunale për fillimin e valës së shitjes së aseteve nga ana e AKP-së. Bazuar në rekomandimet e përfaqësuesve të AKP-së, Qeveria Komunale mori vendim për shpalljen në interes publik të pesë aseteve në territorin e Komunës së Dragashit. U autorizua zyrtari ligjor që, në bashkëpunim me Shërbimin Pronësor Juridik dhe zyrtarin për Urbanizëm dhe Planifikim Hapësinor të fillojnë proceduret e nevojshme ligjore për shpalljen e interesit publik për këto asete.
Në pikën e dytë të rendit të ditës, kryetari i Komisionit Komunal për Vlerësimin e Dëmeve të shkaktuara nga vërshimet raportoi për numrin e kërkesave të parashtruara nga qytetarët. Komisioni u autorizua që, më së largu deri ditën e enjte, të dalë në terren për të bërë vlerësimin e të gjitha dëmeve, duke u bazuar në kërkesat e parashtruara nga qytetarët.
Në pikën eventuale u diskutua rreth organizimit dhe mbarëvajtjes së Festivalit Ballkanik të Valleve “Opoja Vallëzon”, i cili do të mbahet më datat 24, 25 dhe 26 korrik. Gjithashtu, u diskutua edhe për Ekspozitën e Deltarit ilir të Sharrit, e cila do të mbahet në ditën e parë të Festivalit, pak para fillimit të tij.
