Me rastin e 146-vjetorit të Lidhjes së Prizrenit, në fshatin Zgatar, në vendlindjen e Ymer Prizrenit, njërës prej figurave kryesore të kësaj ngjarjeje historike, sot u mbajt Manifestimi Tradicional “Sofra e Ymer Prizrenit”, ku me dhjetëra poetë u paraqitën me poezitë e tyre para publikut. Ndërkaq, Manifestimi u shoqërua edhe me disa pika muzikore, si dhe me valle të ndryshme nga ShKA “Bresana”.
Në fjalën e tij, Kryetari Xheladini i përshëndeti të gjithë të pranishmit të cilët morën pjesë në Manifestimin kushtuar 146-vjetorit të Lidhjes së Prizrenit. Ai tha se sot, përmes artit, poezive, këngëve dhe valleve, po kthehemi në histori për të kujtuar kohët e vështira dhe veprat e lavdishme të paraardhësve tanë, për të mbajtur gjallë kujtimet dhe mësimet e së kaluarës sonë, duke e përjetuar atë me ndjenjat e krenarisë dhe dinjitetit.
Në fund të këtij Manifestimi, për tre poetët me poezitë më të mira të përzgjedhura nga juria profesionale, u ndanë mirënjohje nga kryetari i Komunës, z.Bexhet Xheladini, kryesuesja e Kuvendit, znj.Arijeta Skeraj, dhe drejtoresha e DKRS-së, znj.Liridona Misinaj.
