Në Komunën e Dragashit sot filluan aktivitetet për shënimin e Muajit Rozë të Ndërgjegjësimit për Kancerit të Gjirit. Në sallën e Asamblesë Komunale u mbajt një ligjëratë vetëdijesuese nga doktoresha gjinekologe, znj.Sebahate Sylejmani Shala. Kjo ligjëratë u organizua nga Grupi i Grave Asambleiste, së bashku me kryesuesen e Kuvendit dhe zyrtaren për Barazi Gjinore.
Ligjërata mblodhi një numër të madh të grave dhe vajzave nga Komuna të Dragashit, të cilat patën rastin që të marrin më shumë informacione rreth sëmundjes së kancerit të gjirit, si dhe masat që duhet ndërmarrë për parandalimin e kësaj sëmundjeje.
Kryetari Xheladini falënderoi organizatoret për këtë ligjëratë, për të cilën tha se do të shërbejë si një moment vetëdijesimi për rëndësinë që ka diagnostifikimi i hershëm dhe parandalimi i kancerit të gjirit, duke u shprehur i bindur se njohuritë dhe informatat që do të merren nga kjo ligjëratë do të jenë shumë të dobishme për të gjithë. Kryetari Xheladini theksoi se, së bashku me Kabinetitn e tij do të jenë çdo herë mbështetës të fuqishëm të çfarëdo nisme që ka për qëllim sensibilizimin e opinionit lidhur me çështjet e shëndetit publik, që janë me interes për të gjithë qytetarët tanë, e sidomos për grupet më pak të përfaqësuara, siç janë gratë dhe vajzat, komunitetet joshumicë, personat me aftësi të kufizuar etj.
Ndërkaq, Kryesuesja Arijeta Skeraj falënderoi të gjitha gratë dhe vajzat për interesimin e tyre që të marrin pjesë në këtë ligjëratë, duke premtuar se gjatë këtij muaji do të vazhdohet me aktivitete të tjera për ndërgjegjësimin dhe parandalimin e kancerit të gjirit. Kryesuesja Skeraj shtoi se organet e qeverisjes lokale këtë vit kanë marrë dy vendime të rëndësishme dhe me interes për gratë e Komunës sonë, ku të gjitha gratë e prekura me kancer do të subvencionohen me nga 500 euro, ndërsa nga viti 2025 edhe Papa Testi do të bëhet falas.
Para fillimit të ligjëratës, iu ndanë mirënjohje:
Kryetarit Bexhet Xheladini – për kontributin e dhënë në avancimin e pozitës së gruas dhe mbështetjen e projekteve dedikuar grave të Komunës sonë;
Doktoreshës Sebahata Sylejmani Shala – për kontributin e jashtëzakonshëm dhe sakrificën e treguar në mbrojtjen e shëndetit të grave në Komunën e Dragashit;
Zyrtares Nacionale të Programeve në OSBE, Besarta Halimit – për kontributin e çmuar në realizimin dhe mbështetjen e projekteve dedikuar grave të Komunës sonë.
Pas përfundimit të ligjëratës, u vazhdua me një marsh, në shenjë solidarizimi dhe mbështetjeje për gratë e prekura nga sëmundja e kancerit të gjirit.
