Sot në ambientet e QKMF-së në Dragash u zhvillua ceremonia e pranim-dorëzimit të Ultrazërit me tri sonda, i cili u dhurua si donacion nga organizata turke TIKA. Ky donacion erdhi si kërkesë e Grupit të Grave Asambleiste të Kuvendit të Komunës së Dragashit, me mbështetje të Kryetarit Xheladini.
Në ceremoninë e pranim-dorëzimit të Ultrazërit morën pjesë kryetari i Komunës, z.Bexhet Xheladini, kryesuesja e Kuvendit, znj.Arijeta Skeraj, anëtare të Grupit të Grave Asambleiste dhe zyrtarë të tjerë komunalë. Nga ana e përfaqësuesve të institucioneve turke të pranishëm ishin ambasadori i Turqisë në Kosovë, Shkelqësia e Tij Sabri Tunc Angılı, koordinatorja e TIKA-s, znj.Fulya Aslan, kreu i Konsullatës së Përgjithshme Turke në Prizren, z.Celal Dogan, si dhe përfaqësues të LMT-së, Njësia në Dragash.
Kryetari Xheladini e vlerësoi si shumë të rëndësishëm për nevoja të QKMF-së dhurimin e këtij Ultrazëri. Ai tha se përfitues të këtij donacioni janë gratë e tri komuniteteve të Komunës sonë. Me këtë Ultrazë modern, mjekja gjinekologe do të ketë mundësinë më të lehtë për të zbuluar shumë sëmundje në fazën e hershme, ku dhe suksesi i shërimit është shumë më i madh. Ai falënderoi Ambasadorin për ndihmat e shumta dhe të vazhdueshme të shtetit turk për popullin dhe institucionet e Komunës së Dragashit, si para luftës, ashtu edhe gjatë dhe pas luftës.
Kryesuesja Skeraj tha se me këtë donacion kanë përfituar shumë stafi i QKMF-së dhe pacientët të cilët marrin shërbime nga kjo qendër, andaj si përfaqësues të qytetarëve do të jenë gjithmonë mirënjohës për përkrahjen e parezervë nga institucionet e Turqisë.
Në anën tjetër, Ambasadori Sabri Tunc Angılı është shrehur i kënaqur për përkrahjen e ofruar për Komunën e Dragashit, duke shtuar se është i gëzuar që ky donacion ka ardhur në këto ditë festive për qytetarët.
