Me rastin e shënimit të 8 Marsit – Ditës Ndërkombëtare të Gruas, sot në sallën e Kuvendit Komunal u organizua takim me gra dhe vajza nga Komuna jonë. Në këtë takim ishte i pranishëm edhe kryetari i Komunës së Dragashit, z.Bexhet Xheladini.
Takimin e hapi zyrtarja për Barazi Gjinore, znj.Lindita Kozmaqi Piraj, e cila uroi të pranishmet për 8 Marsin, duke shtuar se kjo është një ditë që shërben për të reflektuar mbi të drejtat e grave dhe për të promovuar barazinë gjinore.
Kryetari i Komunës, z.Bexhet Xheladini, në fjalën e tij uroi të gjitha gratë e vazjat për këtë ditë dhe u shpreh shumë i nderuar që ishte pjesë e shënimit të 8 Marsit, bashkë me këto gra dhe vajza të Komunës sonë. Ai tha se si kryetar i Komunës është i gatshëm që të jetë pranë tyre në çdo rrugëtim, duke i shfrytëzuar të gjitha mundësitë që ka në dispozicion për t’i përkrahur në çdo iniciativë që i shërben përmirësimit të pozitës së grave në të gjjtha fushat.
Në anën tjetër, kryesuesja e Kuvendit, znj.Arijeta Skeraj, shfrytëzoi rastin që t’ua shprehë urimet më të përzemërta për këtë ditë, duke u uruar shëndet dhe suksese në punët e tyre.
Pas përfundimit të aktiviteteve në Dragash, gratë pjesëmarrëse të këtij takimi, së bashku me Kryetarin Xheladini vizituan shtëpinë muze të familjes Qerkezi në Gjakovë, ku u pritën nga znj.Ferdonije Qerkezi.
Kryetari Xheladini e uroi zonjën Ferdonije me rastin e Ditës Ndërkombëtare të Gruas, duke e falënderuar njëkohësisht për mikpritjen e ngrohtë. Ai tha se bashkëndiejnë dhembjen me Nënën Ferdonije për fatin e familjarëve të saj të zhdukur që nga marsi i vitit 1999 dhe se qëndresa e saj heroike është shembull i një gruaje të fuqishme, e cila nuk dorëzohet përballë sfidave të jetës.
Kryetari Xheladini, në shenjë mirënjohje i dhuroi znj.Ferdonije Qerkezi një dekoratë simbolike me stemën e Komunës së Dragashit, ndërsa Kryesuesja Skeraj i dhuroi një punim dore nga Këndi i Kurajos.
