Sot u mbajt takimi i Shtabit Emergjent në të cilin u diskutua situata aktuale pas rritjes së numrit të pacientëve me COVID- 19 në Komunën e Dragashit.
Duke folur për situatën aktuale, kryetari i komunës, Shaban Shabani, në fjalën e tij hyrëse, informoi anëtarët e Shtabit Emergjent për situatën aktuale që u krijua pas rritjes së vazhdueshme të numrit të të infektuarve në Kosovë, si dhe rritjes në numrin e të infektuarve në Dragash.
Ai theksoi se sipas statistikave zyrtare, 590 qytetarë të komunës së Dragashit janë infektuar me virusin korona që nga fillimi i epidemisë, dhe se 45 prej tyre kanë humbur jetën ndërsa153 raste janë aktive. Sa i përket vaksinimit, kryetari Shabani theksoi se deri më tani 8140 qytetarë të komunës sonë e kanë marrë vaksinën.
Nga takimi, ai u bëri thirrje qytetarëve të aplikojnë për vaksinim dhe të respektojnë të gjitha masat dhe rekomandimet e nxjerra nga IKSHPK dhe Qeveria e Kosovës.
Drejtori i Drejtorisë së Shëndetësisë Behar Brenoli informoi të pranishmit në detaje për situatën si dhe për masat dhe rekomandimet që po zbatohen në institucionet shëndetësore në nivelin e Komunës së Dragashit, me qëllim që të ndihmojnë qytetarët në mënyrën më të mirë duke përfshirë edhe vaksionimin masiv.
Komandanti i policisë në Dragash, Shaqir Uka, theksoi se është e nevojshme që të rriten inspektimet e inspektoratit së bashku me policinë në mënyrë që të zbatohen të gjitha rekomandimet në lidhje me respektimin e masave epidemiologjike. Ai theksoi se masat janë në fuqi, dhe se në 24 orët e kaluara, policia vendosi 13 gjoba për mosrespektimin e masave dhe u bëri thirrje qytetarëve që të respektojnë të gjitha masat e miratuara nga Qeveria e Kosovës.
Kryetari i Këshillit të Bashkësisë në Dragash, Driton Qengaj njoftoi për masat e marra nga niveli qendror i KBI-së të bëra publike e që lidhen drejtpërdrejtë me aktivitetet nëpër të gjitha xhamitë dhe se të gjithë imamët janë të përkushtuar në ruajtjen e shëndetit të të gjithë qytetarëve duke shtuar se angazhimi i përbashkët i të gjithë akterëve përgjegjës është e vetmja formë për rezultate të mira.
Në fund të takimit u apelua që të respektohen masat dhe të vaksionohemi ngase këto janë mënyrat e vetme për t’u përballur me pandeminë
