Sot, nën kryesimin e kryetarit të Komunës së Dragashit, z.Bexhet Xheladini, u mbajt mbledhja e III-të e rregullt për vitin 2023 e Këshillit Komunal për Siguri në Bashkësi, me këto pika të rendit të ditës:
1. Shqyrtimi dhe miratimi i procesverbalit nga takimi i II-të,
2. Vlerësimi i përgjithshëm i gjendjes së sigurisë, çështjet politike dhe të sigurisë gjatë tremujorit të dytë, veprimet dhe masat për luftimin e shkelësve të ligjit, si dhe masat për shkelësit e ligjit në komunikacion në Komunën e Dragashit,
3. Parapërgatitja dhe vetëdijesimi i qytetarëve për parandalimin nga zjarri gjatë sezonit veror dhe shtimi i masave të sigurisë,
4. Diskutim lidhur me rrugën njëkahore (Unazën e Qytetit) gjatë fluksit të mërgimtarëve,
5. Monitorimi dhe raportimi mbi nivelin e sigurisë dhe zbatimin e planit për siguri në shkolla, dhe
6. Të ndryshme.
Sa i përket gjendjes së përgjithshme të sigurisë brenda territorit të Komunës së Dragashit, bazuar në raportimin e Komandantit të Stacionit Policor në Dragash, Shaqir Uka, si dhe Komandantit të Vijës Kufitare, Shpresim Ramadani, gjendja në territorin tonë për periudhën raportuese u vlerësua e qetë dhe stabile.
Gjithashtu, edhe nga drejtori i DKA-së, Zeni Krasniqi, gjendja e sigurisë nëpër shkollat e Komunës së Dragashit u raportua e qetë dhe pa ndonjë ekses.
Në pikën e tretë të këtij takimi u mor vendim që përmes thirrjeve vetëdijesuese nga Komuna, si dhe përmes organizimit të ligjëratave vetëdijesuse të imamëve nëpër xhamitë e fshatrave, t’u bëhet thirrje qytetarëve të Komunës së Dragashit që ta ruajnë ambientin dhe të kenë kujdes nga zjarret gjatë verës.
Ndërkaq, në pikën e katërt të rendit të ditës u vendos që të zbatohet praktika e njëjtë e organizimit të rrugës njëkahore nëpër Unazën e Qytetit sikur vitin e kaluar, gjatë kohës së verës kur do të ketë fluks të madh të mërgimtarëve.
