Sot është mbajtur mbledhja e Shtabit Emergjent në Komunën e Dragashit, ku anëtarët e Shtabit Emergjent kanë diskutuar për gjendjen aktuale.
Mbledhjen e hapi Kryetari i Komunës, Shabani Shabani.
Drejtori i QKMF, Ramadan Jashari, i njoftoi anëtarët e Shtabit me statistikat e të infektuarve, me monitorimin, kontaktet dhe vizitat që u bëjnë ekipet shëndetësore.
Në Dragash nga rasti i parë e deri më tani kemi të regjistruar gjithsej 70 pacientë me COVID-19, 26 raste të shëruar, 34 raste aktive dhe 10 raste të vdekjes.
Jashari gjithashtu njoftoi se nga UNICEF kanë fituar donacion 1 prodhues oksigjeni.
Në takim u diskutua edhe për situatën aktuale pas vërshimeve në Blaç dhe Zaplluxhe.
Kryetari Shabani shprehu shqetësimin e tij për situatën e krijuar pas vërshimeve të fundit në komunën e Dragashit konkretisht në Zaplluxhe dhe Blaç dhe njoftoi anëtarët e shtabit se komisioni është në terren për vlerësimin e gjendjes për nxjerrjen e raportit të përgjithshëm. Pas kompletimit të raportit do të shqyrtohet mundësia për mbështetje nga komuna dhe njëkohësisht raporti do të dërgohet edhe tek niveli qendror ku pritet edhe mbështetje për sanimin e të gjitha dëmeve të shkaktuara nga vërshimet në këto dy fshatra që për fat të keq janë shumë të mëdha.
Gjithashtu u njoftua se janë kontaktuar kompani të ndryshme në sanimin e situatës së krijuar dhe evitimin e pengesave për lëvizje të lirë edhe evitim të rrezikut të mëtutjeshëm.
