BETOHET KRYETARI BEXHET XHELADINI DHE ANËTARËT E RINJ TË KUVENDIT
Në sallën e Asamblesë Komunale sot u mbajt Mbledhja e parë inauguruese e Kuvendit të Komunës së Dragashit, në të cilën u bë betimi i 21 anëtarëve të rinj të Kuvendit dhe i kryetarit të Komunës, z. Bexhet Xheladini, për mandatin e ardhshëm katërvjeçar.
Anëtarët e Kuvendit të dalë nga zgjedhjet e fundit dhanë zotimin e tyre për të shërbyer me integritet, transparencë dhe përkushtim ndaj interesit publik, duke shënuar nisjen e legjislativit të ri lokal. Po ashtu, Kryetari Xheladini dha betimin e tij solemn para qytetarëve, duke u zotuar për vazhdimin e qeverisjes së mirë, të ndershme dhe të orientuar drejt rezultateve konkrete për çdo banor të Komunës.
Pas ceremonisë së inaugurimit, në mënyrë të organizuar u bënë homazhe te shtatorja e Komandantit Legjendar Adem Jashari dhe varrezat e dëshmorëve.
—
Fjalimi i Kryetarit të Komunës së Dragashit, z. Bexhet Xheladini, në seancën inauguruese:
Të nderuar anëtarë të Kuvendit Komunal,
Të nderuar qytetarë të Dragashit,
Të nderuar të pranishëm,
Së pari, më lejoni t’ju falënderoj nga zemra të gjithë juve, qytetarëve, për besimin që ma keni dhënë edhe një herë për ta udhëhequr Komunën tonë. Ky besim për mua është nder i madh, por edhe përgjegjësi e jashtëzakonshme. Ju siguroj se ky mandat do të jetë vazhdim i punës së palodhshme, me përkushtim, transparencë dhe rezultate konkrete – ashtu siç kemi dëshmuar në mandatin e parë.
Të nderuar anëtarë të rinj të Kuvendit të Komunës së Dragashit,
Ju uroj mirëseardhje dhe suksese në detyrën tuaj. Sot, secili prej nesh e ka dhënë betimin para qytetarëve, dhe ky betim është zotimi ynë që interesin publik do ta vendosim mbi çdo interes tjetër.
Gjatë katër viteve të kaluara kemi punuar me përkushtim në shumë fusha: në infrastrukturë, arsim, shëndetësi, mirëqenie sociale, zhvillim ekonomik dhe administratë më efikase. Kemi realizuar projekte të rëndësishme dhe kemi vendosur themelet e një transformimi që duhet të vazhdojë.
Qytetarët na e kanë besuar edhe një mandat sepse së bashku kemi dëshmuar se qeverisja e mirë është e mundur:
– Katër vite me qeverisje me duar të pastra, pa asnjë rast korrupsioni e pa asnjë aktakuzë ndaj zyrtarëve komunalë;
– Katër raporte radhazi të auditorit me vlerësime të shkëlqyera për transparencën financiare;
– Katër vite radhazi fitues të Grantit të Performancës;
– Mbi 10 milionë euro investime, duke përfunduar infrastrukturën në mbi 90% të vendbanimeve dhe duke sjellë ujësjellësin për 15 fshatra e qytezën e Dragashit;
– Investime të rëndësishme në arsim, shëndetësi, kulturë, rini e sport, transport falas për nxënësit dhe shërbime shëndetësore falas për qytetarët.
Të nderuar qytetarë,
Sot, me marrjen e këtij besimi për herë të dytë, dua të ritheksoj: Unë do të jem kryetar i të gjithëve. Do t’i shërbej secilit qytetar njësoj – pa dallim bindjeje politike, etnie apo vendbanimi. Për mua, çdo njeri i kësaj komune është qytetar i barabartë, jo votues apo përfaqësues partie.
Mandati i dytë që fillojmë sot do të jetë mandat i thellimit të punës, i përfundimit të projekteve të mëdha dhe i hapjes së mundësive të reja për komunitetin tonë.
Për katër vitet e ardhshme, punët tona prioritare do të përfshijnë:
– Përfundimin e infrastrukturës rrugore dhe ndriçimit publik në të gjitha vendbanimet;
– Investime të reja në shëndetësi, arsim, kulturë dhe sport;
– Përmirësimin e infrastrukturës shkollore dhe krijimin e kushteve moderne për fëmijët tanë;
– Zhvillimin e infrastrukturës sportive dhe hapësirave të reja për rininë;
– Finalizimin e PZHK-së dhe hartave zonale për planifikim të qëndrueshëm urban e rural;
– Zgjidhjen e çështjeve të pronave me AKP-në për zhvillim më të fuqishëm ekonomik, blegtorial, bujqësor dhe në energji të ripërtritshme;
– Nxitjen e turizmit, i cili pritet të marrë hov të ri me ndryshimet në ligjin e Parkut Kombëtar.
Të gjitha këto do të ndikojnë drejtpërdrejt në cilësinë e jetës dhe në zhvillimin e gjithanshëm të Komunës sonë.
Në fund, dua të shpreh mirënjohjen time të veçantë për familjen time për mbështetjen e pandalshme dhe për Zonjën e Parë të Komunës, e cila ka treguar përkushtim dhe vullnet të jashtëzakonshëm në çdo hap të këtij rrugëtimi. Pa mbështetjen e saj, nuk do të isha sot këtu.
Ju falënderoj edhe një herë për besimin! Premtoj se këtë besim tuajin do t’ua kthej me punë të ndershme dhe rezultate konkrete.
Le të jetë ky fillim i një kapitulli të ri suksesi për Komunën e Dragashit. Le të punojmë së bashku me energji të re, me vullnet, me ide të reja, me respekt ndaj njëri-tjetrit dhe me përkushtim të përbashkët për të mirën e qytetarëve tanë.
Zoti e bekoftë Komunën tonë dhe gjithë qytetarët e Dragashit!
Ju faleminderit!
