Edicioni i pestë i Festivalit Ballkanik të Valleve “Opoja Vallëzon”, ku përveç shteteve të Ballkanit, morën pjesë edhe Ukraina dhe Polonia, u përmbyll natën e mbrëmshme me një atmosferë të jashtëzakonshme. Natën e tretë dhe të fundit të Festivalit e bëri edhe më të veçantë nderimi i amerikanes Janet Reineck me titullin Qytetare Nderi e Komunës së Dragashit. Në këtë ceremoni morën pjesë edhe asambleistët e Kuvendit Komunal në Dragash.
Kryetari i Komunës së Dragashit, z.Bexhet Xheladini, i dhuroi Shiritin, Çelësin dhe Çertifikatën, ndërsa kryesuesi i Kuvendit i dorëzoi Vendimin e Asamblesë Komunale të vitit të kaluar për shpalljen e znj.Reineck Qytetare Nderi e Komunës së Dragashit.
Duke marrë parasysh se antropologia amerikane, znj.Janet Reineck, gjatë qëndrimit të saj në Kosovë në vitet ’80-të dhe ’90-të ka dhënë një kontribut të jashtëzakonshëm në studimin dhe promovimin e traditave, dokeve, zakoneve dhe veshjeve kombëtare opojane, si dhe ka pasur nje lidhje të veçantë emocionale me fshatrat Bellobrad dhe Buqe, znj.Arijeta Qafleshi Skeraj, asambleiste e Kuvendit Komunal të Dragashit nga fshati Bellobrad, i dhuroi veshje kombëtare të grave, ndërsa djali i dëshmorit të kombit Ruzhdi Berisha, z.Kreshnik Berisha nga fshati Buqe, i dhuroi asaj veshje kombëtare të burrave.
Fituese e këtij Festivali doli Folk Dance Ansamble “KVITY UKRAYINY” nga Ukraina. Kryetari Xheladini i falënderoi të gjithë organizatorët dhe grupet pjesëmarrëse të Festivalit për atmosferën argëtuese që i dhuruan qytetarëve të Komunës së Dragashit.
