Sot u mbajt diskutimi publik me qytetarë për Draft Planin e Veprimit për Personat ne Aftësi të Kufizuara 2024 – 2028. Hapjen e diskutimit e bëri drejtori për Ekonomi, Financa dhe Zhvillim, z.Qamil Kolloni, ndërsa prezantimin e Draft Planit para të pranishmëve e bëri koordinatori i Grupit Punues, z.Agon Baxhaku.
Kryetari i Komunës së Dragashit, z.Bexhet Xheladini, i falënderoi qytetarët, e në veçanti vajzat dhe gratë, të cilat çdo ditë e më shumë po marrin pjesë në konsultime publike, duke u bërë pjesë aktive në proceset e vendimmarrjes. Ai tha se hartimi i Planit të Veprimit për Personat me Aftësi të Kufizuara është shumë i rëndësishëm, pasi që prek një kategori të veçantë të qytetarëve, duke shtuar se duhet të bëjmë çmos që t’i funksionalizojmë edhe organizatat e ndryshme të cilat merren me këto kategori dhe, përmes zbatimit të këtij Plani dhe thirrjeve publike nga Komuna, të ofrohen shërbime efikase që ndikojnë në përmirësimin e mirëqenies së personave me aftësi të kufizuara.
Qytetarët patën rastin që të japin vërejtjet, kritikat dhe propozimet lidhur me përmbajtjen e këtij dokumenti. Afati për dërgimin e komenteve online është i hapur deri më 15.06.2024, kur përfundon periudha e kosultimit publik me qytetarë. Më pas, Draft Plani i Veprimit për Personat me Aftësi të Kufizuara do të procedohet për shqyrtim dhe miratim përfundimtar në Kuvendin e Komunës së Dragashit.
