Me një Akademi Solemne dhe homazhe, sot shënuam 28 Nëntorin – Ditën e Flamurit, duke kujtuar dhe nderuar të gjithë ata që me sakrificë e vendosmëri realizuan ëndrrën shekullore të popullit shqiptar për liri dhe pavarësi.
Fjalimi im i plotë me rastin e Akadamisë Solemne, të mbajtur në sallën e Kuvendit të Komunës:
“Sot, në këtë ditë të shenjtë të historisë sonë kombëtare, jemi mbledhur në këtë Akademi Solemne për të nderuar 28 Nëntorin – Ditën e Flamurit, ditën që shënon gurthemelin e shtetësisë shqiptare dhe kurorëzimin e përpjekjeve shekullore për liri, pavarësi dhe identitet.
Në këtë datë, më 1912, nga Vlora u shpall Pavarësia e Shqipërisë, një akt që lartësoi aspiratën e shumë brezave dhe i dha formë shtetit shqiptar modern. Po në këtë datë, shekuj më herët, heroi ynë kombëtar Gjergj Kastrioti – Skënderbeu ngriti flamurin e tij, duke shënuar fillimin e një epoke të rezistencës dhe krenarisë kombëtare.
28 Nëntori është amaneti i atyre që sakrifikuan gjithçka, është kujtesa që na mëson se liria ka çmim, por mbi të gjitha ka vlerë të shenjtë. Prandaj, në këtë ditë, përulemi me nderim përpara Komandantit legjendar Adem Jashari, veprës së heronjve, të dëshmorëve, patriotëve, iluministëve dhe çdo shqiptari që dha kontributin e tij në rrugën e gjatë drejt lirisë.
Të nderuar të pranishëm,
Komuna jonë, Dragashi multietnik, është shembull i bashkëjetesës dhe respektit ndërmjet komuniteteve shqiptare, gorane dhe boshnjake. Harmonia jonë e brendshme është vlerë, është pasuri dhe është model i shoqërisë që duam të ndërtojmë – një shoqëri ku secili qytetar, pavarësisht dallimeve, e gjen veten të barabartë, të respektuar dhe të përfshirë në institucione.
Si Kryetar i Komunës së Dragashit, e shoh këtë ditë si një moment për të rikonfirmuar zotimin tonë institucional dhe njerëzor: t’i shërbejmë çdo qytetari me përgjegjësi, me ndershmëri dhe me përkushtim;
të mbrojmë të drejtat e të gjitha komuniteteve;
të ndërtojmë ura bashkëpunimi dhe jo mure ndarjeje.
Në frymën e kësaj dite, le t’i bashkojmë përpjekjet për zhvillimin ekonomik të Komunës sonë – nga fuqizimi i bujqësisë e blegtorisë, te promovimi i turizmit e zhvillimi i infrastrukturës, mbështetja për të rinjtë dhe nxitja e investimeve të reja. Zhvillimi është detyrimi ynë ndaj brezave që po rriten.
Të nderuar qytetarë,
28 Nëntori është një thirrje për unitet, për punë të përditshme, për besim te vetja dhe te e ardhmja jonë e përbashkët. Le ta ruajmë këtë frymë, le ta bartim këtë energji në çdo hap, sepse vetëm së bashku mund t’i japim Komunës së Dragashit vendin që meriton.
Gëzuar 28 Nëntorin – Ditën e Flamurit!
Urime të gjithë qytetarëve të Komunës së Dragashit dhe mbarë shqiptarisë!
Nderim i përjetshëm për të rënët që na e çelën rrugën e lirisë!
Lavdi dëshmorëve të Kombit!
Qoftë i përjetshëm kujtimi për ta!
Faleminderit!”
