Sot kryetari i Komunës së Dragashit, z.Bexhet Xheladini, së bashku me drejtorin e Shëndetësisë dhe Mirëqenies Sociale, z. Behar Brenoli, dhe shefin e kabinetit, z.Veton Halili, vizitoi Qendrën Kryesore të Mjekësisë Familjare “Adem Berisha” në Dragash, ku u takua me drejtorin e kësaj qendre, stafin profesional (mjekët) dhe punëtorët e laboratorit. Në takimet me ta u bisedua për gjendjen aktuale të shëndetësisë, problemet dhe sfidat me të cilat po përballen institucionet shëndetësore në komunën tonë, si dhe planet për përmirësimin e cilësisë së shërbimeve që u ofrojnë këto institucione qytetarëve.
Paraprakisht Kryetari Xheladini, së bashku me drejtorin e Shëndetësisë, z.Behar Brenoli, atë të Administratës, z.Vetim Ramadani, dhe drejtorin e Urbanizmit, z.Bean Hadžiasan, vizitoi Qendrën e Mjekësisë Familjare në Krushevë dhe u njoh me problemet dhe sfidat me të cilat ballafaqohet stafi shëndetësor atje, ku i njoftoi se tashmë ka nisur procedura e tenderit për ndërtimin e objektit të ri të QMF-së, i cili do të përfundojë sipas planit, deri në fund të vitit të ardhshëm.
Kryetari Xheladini tha se është çdo herë i gatshëm që si kryetar i Komunës, por edhe si koleg i tyre, ta dëgjojë zërin e tyre dhe t’i marrë parasysh nevojat, vërejtjet dhe propozimet e tyre për çdo punë që do të jetë në funksion të përmirësimit të cilësisë së shërbimeve shëndetësore për qytetarët e komunës sonë.
