Kryetari i Komunës Shaban Shabani i shoqëruar nga nënkryetarët Selami Saiti dhe Sherif Aga sot ka pritur për vizitë Kryeministrin e Kosovës z. Abdullah Hoti i cili ishte i shoqëruar nga zëvendëskryeministri Driton Selmanaj, ministrat Arban Abrashi, Vesel Krasniqi dhe Besian Mustafa, zëvendësministrat Selim Kryeziu, Adnan Rexhepllar e Hamza Bale, deputetë si dhe përfaqësues tjerë institucional nga niveli qendror.
Qëllimi i vizitës së kryeministrit ishte inspektimi i punimeve në rrugën Zhur-Dragash, për të vazhduar më pas vizitën në bizneset e komunës së Dragashit.
Kryetari Shabani falënderoi kryeministrin për vizitën dhe njëkohësisht e njoftoi për resurset që ka komuna, të arriturat e deritanishme, sfidat dhe problemet me të cilat po ballafaqohen qytetarët e komunës së Dragashit duke përfshirë edhe situatën e përgjithshme me COVID-19.
Nga kryeministri u kërkua që të vazhdohet mbështetja për projekte infrastrukturore siq është ai i rrugës Zhur-Dragash- Brod dhe Tyrbe e Pllavës-Zaplluxhe e cila falë propozimit të amandamentit nga deputeti Kujtim Gashi dhe mbështetjes nga një pjesë e madhe e deputetëve nga i gjithë spektri politik ka marrë mbështetje për buxhetim shtesë për vazhdim të punimeve. Krahas kësaj u kërkua edhe mbështetja e bizneseve dhe fermerëve kategori këto që po përballen me vështirësi të mëdha në këtë kohë pandemie.
Kryeministri Hoti u zotua se bashkë me kabinetin qeveritar do të kujdeset të mbështetet komuna e Dragashit, bizneset e saj dhe të gjitha projektet duke ju dhënë prioritet atyre që mundësojnë zhvillimin ekonomik si: turizmi e bujqësia.
