Të nderuar qytetarë të Komunës së Dragashit,
Regjistrimi i Popullsisë është një proces me rëndësi shumë të madhe. Përveç tjerash, nga numri i banorëve në një komunë varet buxheti komunal, investimet kapitale, numri i mjekëve, stomatologëve dhe teknikëve medicionalë, numri i punëtorëve të arsimit dhe administratës komunale, numri i delegatëve të Kuvendit të Komunës, koeficienti i pagave në sektorin publik etj.
Andaj, duke marrë parasysh rëndësinë dhe ndikimin e drejtpërdrejtë që ka ky proces në të gjitha këto fusha që prekin mirëqenien tonë, është obligim jo vetëm ligjor, por edhe moral dhe patriotik i të gjithë qytetarëve që t’i bashkohen procesit të regjistrimit dhe ta inkurajojnë njëri-tjetrin për ta shfrytëzuar këtë mundësi deri në ditën e fundit të këtij procesi (17.05.2024).
Gjithashtu, informojmë të gjjthë qytetarët e Komunës së Dragashit se regjistrimi i banesave dhe ekonomive familjare nuk ka asnjë lidhje dhe nuk ndikon në rritjen e faturave të tatimit në pronë.
Ju bëjmë thirrje që së bashku të bëhemi pjesë e planifikimit për të ardhmen, duke kontribuuar secili individualisht në këtë proces!
Për të gjithë qytetarët e interesuar të cilët kanë nevojë për informacione shtesë lidhur me procesin e regjistrimit, ju lutemi mos hezitoni të kontaktoni përgjegjësit nga Komisioni Komunal i Regjistrimit të Popullsisë, të cilët do t’ju ofrojnë informacionet dhe kontaktet e nevojshme për mbikëqyrësit dhe regjistruesit në vendbanimin tuaj.
Komisioni Komunal për Regjistrimin e Popullsisë/ TEL.: 046 190 277
Uebfaqja zyrtare e ASK-së:
www.ask.rks-gov.net
Me respekt,
Bexhet Xheladini
Kryetar i Komunës dhe kryetar i Komisionit Komunal për Regjistrimin e Popullsisë
#Planifikoteardhmen #Regjistrohu
