Kryetari i Komunës së Dragashit, z.Bexhet Xheladini, së bashku me kryesuesen e Kuvendit, znj.Arijeta Skeraj, mirëpritën për herë të parë në Komunën tonë drejtoreshën e Institutit Kombëtar Demokratik (NDI), Ambasadoren Nancy Soderberg. Me këtë rast, Kryetari Xheladini e informoi me një pasqyrë të shkurtër të organizimit politik dhe administrativ të Komunës së Dragashit. Ai gjithashtu e falënderoi Ambasadoren Soderberg për mbështetjen e pakursyer ndaj institucioneve të Kosovës, me theks të veçantë lidhur me adresimin e çështjeve gjinore dhe dhunës në familje.
Këtë vit, Ambasadorja Soderberg dhe NDI-ja kanë zgjedhur Komunën e Dragashit si nikoqire të organizmit të Debatit mbi politikat në kuadër të Javës së Gruas, ku përfaqësues të shumtë nga komunat e Regjionit të Prizrenit morën pjesë për të diskutuar për adresimin e çështjeve gjinore, dhunës në familje dhe dhunës me bazë gjinore, si dhe politikat e shërbimeve të kujdesit parësor shëndetësor në nivel lokal.
Në fjalën hyrëse të këtij Debati, Kryetari Xheladini prezantoi disa hapa të rëndësishëm që Komuna e Dragashit ka ndërmarrë në drejtim të avancimit të çështjeve gjinore – mbrojtjes, promovimit dhe realizimit të të drejtave të vajzave dhe grave të të gjitha komuniteteve që jetojnë në Komunën tonë – përmes zbatimit të politikave progresive që kanë për qëllim zhdukjen e barrierave gjinore, duke u fokusuar veçanërisht tek politikat në fushën e shëndetësisë lokale.
