Kryetari i Komunës, z.Bexhet Xheladini, së bashku me zyrtarë komunalë priti sot një delegacion të KFOR-it Turk, me të cilit pati një diskutim lidhur me pasojat që kanë shkaktuar vërshimet e muajit të kaluar që prekën disa fshatra të Komunës së Dragashit. Në këtë takim morën pjesë edhe përfaqësuesit e fshatrave të prekura nga vërshimet.
Pas informimit për gjendjen aktuale dhe masat e ndërmarra nga Komuna e Dragashit për sanimin e gjendjes, Kryetari Xheladini kërkoi mbështetjen e LMT-së së KFOR-it Turk, që me mekanizmin e tyre të bëjnë pastrimin e lumenjve.
Përfaqësuesit e KFOR-it Turk u shprehën të gatshëm për të ofruar ndihmën e tyre, duke theksuar se kanë në dispozicion edhe një ekip mjekësor dhe një ekip të veterinarëve, me të cilët do të mund të ofrojnë përkrahjen e tyre në rast nevoje. Fillimisht, ata thanë se do të dalin në terren për të bërë një analizë të situatës në fshatrat e prekura nga vërshimet.
Në anën tjetër, Kryetari Xheladini falënderoi KFOR-in Turk për mbështetjen e vazhdueshme dhe të pakursyer për qytetarët e Komunës së Dragashit, duke theksuar sidomos ndihmën e tyre në trasimin e qindra kilometrave rrugë nëpër territorin e Komunës sonë, pastaj ndihmat dhe donacionet e ndryshme që, në bashkëpunim edhe me TIKA-n, kanë ofruar për arsimin, shëndetësinë dhe kulturën në Komunën e Dragashit.
