Në kuadër të aktiviteteve për nder të 1 Qershorit – Ditës Ndërkombëtare të Fëmijëve, sot në ShFMU “Fetah Sylejmani” në Dragash u organizua një program festiv me nxënësit e kësaj shkolle. Në këtë manifestim morën pjesë kryetari i Komunës, z.Bexhet Xheladini, kryesuesja e Kuvendit, znj.Arijeta Skeraj, nënkryetari i Komunës, z.Resul Fetahu, drejtorë komunalë dhe zyrtarë të Kabinetit, përfaqësues të OVL të UÇK-së, përfaqësues të policisë dhe LMT-së, prindër, mësimdhënës dhe qytetarë të shumtë.
Në fjalën e tij, Kryetari Xheladini i uroi të gjithë fëmijët për 1 Qershorin – Ditën Ndërkombëtare të Fëmijëve dhe Festën e Abetares. Ai tha se këto ditë gjithandej shkollave fillore të Komunës sonë mbretëron gëzimi dhe festa, duke shtuar se këto manifestime janë dëshmi e përkushtimit të palëkundur të mësimdhënësve dhe menaxhmenteve shkollore, të cilët me dashuri, angazhim dhe përkushtim, u japin fëmijëve tanë mjedisin më të mirë për të mësuar, për të krijuar dhe për të shprehur talentin e tyre të jashtëzakonshëm.
Me nga një fjalë rasti të pranishmëve iu drejtuan edhe drejtori i DKA-së, z.Zeni Krasniqi, drejtori i ShFMU “Fetah Sylejmani”, z.Flurim Çengaj, dhe drejtoresha e DKRS-së, znj.Liridona Misinaj.
