31/03/2026 14:05
Sot u themelua Grupi Joformal i Grave Asambleiste të Kuvendit të Komunës së Dragashit, në një takim të organizuar me mbështetjen e OSBE-së.
Në këtë takim, përveç asambleisteve të Kuvendit të Komunës, morën pjesë edhe shefja e Kabinetit të Kryetarit të Komunës, znj.Arijeta Skeraj, dy drejtoreshat komunale, znj.Liridona Misinaj dhe znj.Raisa Shabani, si dhe zyrtarja për Barazi Gjinore, znj.Lindita Kozmaqi Piraj, të cilat do të jenë pjesë aktive e aktiviteteve të këtij grupi.
Gjatë takimit u bë edhe zgjedhja e strukturave drejtuese të Grupit. Kryetare e Grupit u zgjodh asambleistja nga radhët e LDK-së, znj. Xhylferie Bahtijari Beqiri, një asambleiste shumë aktive e cila ka dhënë një kontribut të çmuar në iniciativat e grupit, ndërsa nënkryetare u zgjodh asambleistja nga radhët e LVV-së, znj. Afrore Vejseli.
Po ashtu, në takim u diskutua për aktivitetet dhe angazhimet e shumta të Grupit në të kaluarën, nën udhëheqjen e kryetares së deritashme, znj. Suada Bajrami, e cila e udhëhoqi këtë grup për dy mandate, duke vlerësuar kontributin e saj në fuqizimin e rolit të grave në vendimmarrje.
Grupi i Grave Asambleiste shpreh mirënjohje ndaj kryetarit të Komunës, z. Bexhet Xheladini, për mbështetjen e vazhdueshme ndaj iniciativave dhe aktiviteteve të këtij grupi.
09/03/2026 08:44
Sot pata kënaqësinë të pres në takim drejtorin e Projektit “E Ardhmja e Saj – Fuqizimi i Grave Sipërmarrëse në Kosovë”, z. Valentin Hoxha, me të cilin nënshkruam Memorandumin e Bashkëpunimit për zbatimin e këtij projekti në Komunën e Dragashit. Ky projekt financohet nga Ministria Gjermane për Bashkëpunim Ekonomik dhe Zhvillim, dhe zbatohet nga OJQ “PREDA Plus”, në partneritet me WEntrepreneur dhe me mbështetjen e ASB-së.
Ky bashkëpunim synon të mbështesë dhe fuqizojë gratë sipërmarrëse në Komunën tonë përmes zhvillimit të aftësive të tyre në biznes, krijimit të rrjeteve profesionale dhe rritjes së mundësive për pjesëmarrje aktive në ekonominë lokale.
Komuna e Dragashit mbetet e përkushtuar për të krijuar më shumë mundësi për gratë dhe vajzat, duke mbështetur iniciativat që kontribuojnë në zhvillimin ekonomik dhe në barazinë gjinore në shoqërinë tonë.
Falënderoj z. Hoxha dhe partnerët e projektit për bashkëpunimin dhe për angazhimin e tyre në mbështetje të grave sipërmarrëse në Kosovë.
BEXHET XHELADINI – Kryetar i Komunës së Dragashit
