Kryetari i Komunës, z.Bexhet Xheladini, së bashku me kryesuesen e Kuvendit, znj.Arijeta Skeraj, nënkryetarin e Komunës nga radhët e komuniteteve, z.Fejsal Halilović, shefin e Zyrës për Komunitete, z.Uzair Hamza, dhe qytetarin nga Restelica, njeriun e vullnetit të mirë, z.Adnan Mutash, gjatë ditës së sotme qëndruan për një vizitë zyrtare në Komunën e Mavrovës dhe Rostushës në Maqedoninë e Veriut.
Përfaqësuesit e Komunës sonë u pritën nga kryetari i Komunës Mavrovë dhe Rostushë, z.Medat Kurtovski, dhe kryesuesja e Asamblesë Komunale, znj.Teuta Mirto.
Qëllimi i kësaj vizite ishte vazhdimi i bashkëpunimit me Komunën e Mavrovës dhe Rostushës, me ç’rast palët u dakorduan që ky bashkëpunim të konkretizohet dhe me një binjakëzim të komunave. Një bashkëpunim i tillë besohet se do t’i kontribuojë rihapjes së përkohshme të pikës kufitare të Strezimirit, si dhe të zbatimit më të shpejtë të projektit për asfaltimin e rrugës përmes Strezimirit në drejtim të Restelicës, projekt i cili, sipas përfaqësuesve nga Maqedonia e Veriut, është duke u hartuar nga Ndërmarrja Publike për Rrugët Shtetërore.
Më pas, përfaqësuesit nga Komuna e Dragashit u shoqëruan edhe për një vizitë në Shkollën Fillore Komunale “Hajan Selmani” në Rostushë, ku patën rastin që të informohen rreth historikut të kësaj shkolle dhe procesit mësimor nëpër shkollat e komunës.
Kryetari Xheladini ka falënderuar për mikpritjen e ngrohtë përfaqësuesit nga Komuna e Mavrovës dhe Rostushës.
