Aktivitetet për nder të 16-vjetorit të Pavarësisë së Kosovës në Komunën e Dragashit u përmbyllën sot me një Seancë Solemne, të cilën e udhëhoqi kryesuesja e Kuvendit të Komunës, znj.Arijeta Skeraj. Në këtë seancë morën pjesë familjarë të dëshmorëve, përfaqësues të OVL të UÇK-së, asambleistë, përfaqësues të institucioneve të policisë, KFOR-it Turk, përfaqësues të këshillave lokale të Bashkësisë Islame në Dragash dhe Gorë, ish-kryetarë të Komunës, drejtorë të shkollave, pjesëtarë të Kabinetit e zyrtarë komunalë, media dhe qytetarë të shumtë.
Në fjalën e saj, Kryesuesja Skeraj tha se në këtë ditë të rëndësishme për popullin e Kosovës, me ndjenja të thella të respektit, përuljes dhe krenarisë, i kujtojmë të gjithë ata që me sakrificën e tyre na trasuan rrugën drejt lirisë dhe krijimit të shtetit të pavarur të Kosovës, duke bërë thirrje që të bashkohemi me një zemër për të festuar lirinë e pavarësinë, dhe për të shprehur vendosmërinë tonë për ndërtimin e një të ardhme të ndritur për Kosovën.
Kryetari i Komunës së Dragashit, z.Bexhet Xheladini, në fjalën e tij ua uroi të gjithë qytetarëve, pa dallim, festën e 17 Shkurtit. Ai tha se kjo datë shënon ngjarjen më të madhe historike që ka vendosur themelet e shtetit më të ri në Ballkan, Republikës së Kosovës, duke shtuar se është detyrë e jona kombëtare dhe qytetare që t’i mbrojmë me fanatizëm vlerat e lirisë, pavarësisë dhe demokracisë, dhe ta ruajmë dhe ta ndërtojmë Republikën tonë të dashur, të cilën e fituam me mundin, përpjekjen dhe sakrificën e shumë brezave.
Me nga një fjalë rasti të pranishmëve iu drejtuan edhe nënkryetari i Komunës për Komunitete, z.Fejsal Halilović, si dhe përfaqësues nga OVL e UÇK-së dhe familjet e Dëshmorëve.
Pas Seancës Solemne, në mënyrë të organizuar u bënë homazhe tek shtatorja e Komandantit Legjendar Adem Jashari, tek varrezat e Dëshmorëve në Dragash dhe Buqe, si dhe te pllaka përkujtimore e dëshmorit turk, Husein Kutlu.
