Sot u mbajt Mbledhja II (e dytë) e rregullt për vitin 2024 e Qeverisë Komunale në Dragash, e cila u kryesua nga kryetari i Komunës, z.Bexhet Xheladini. Në këtë mbledhje u shqyrtuan këto pika të rendit të ditës:
1. Diskutim për rregullimin e infrastrukturës ndërtimore te Tregu i Gjelbër në qytezën e Dragashit;
2. Diskutim për renovimin e kulmeve apo nënkulmeve, si dhe izolimin dhe fasadimin e ndërtesave të banimit kolektiv në qytezën e Dragashit;
3. Diskutim për aktivizimin dhe riparimin e Arkivit të Komunës;
4. Formimi i Komisionit për hartimin e Rregullores për Organizimin e Brendshëm të Administratës Komunale;
5. Formimi i Komisionit për Revidimin e Projektit të Fabrikës për Përpunimin e Ujit të Ujësjellësit Qendror për 15 fshatra;
6. Diskutim për renovimin e Muzeut, Bibliotekës, ish – objektit të DKA-së dhe objektit të Komunës;
7. Shqyrtimi i zbatimit të Strategjisë për Vetëqeverisje Lokale për vitin 2023; dhe
8. Të ndryshme.
Në këtë mbledhje:
– U autorizua Drejtoria e Urbanizmit që menjëherë të fillojë procedurat e nevojshme, me qëllim të zbatimit të politikave komunale për rregullimin e infrastrukturës ndërtimore te Tregu i Gjelbër në qytezën e Dragashit, duke përgatitur fillimisht një propozim-vendim me arsyetim për kryerjen e ndërtimeve të larta te zona e Tregut të Gjelbër, i cili do t’i dërgohet Kuvendit të Komunës për miratim;
– U autorizua Drejtoria përkatëse e Urbanizmit që, në bashkëpunim me Drejtorinë për Ekonomi, Financa dhe Zhvillim, të fillojnë procedurat administrative dhe ligjore për përgatitjen e projektit për renovimin e kulmeve apo nënkulmeve, si dhe izolimin dhe fasadimin e ndërtesave të banimit kolektiv në qytezën e Dragashit;
– Pas prezantimit të gjendjes aktuale të arkivave të institucioneve komunale nga drejtori i Administratës, u autorizua Drejtoria e Administratës që menjëherë të fillojë procedurat për rregullimin dhe renovimin e Arkivit të Komunës;
– U formua Komisioni prej shtatë anëtarëve për hartimin e Rregullores për Organizimin e Brendshëm të Administratës Komunale, duke ndjekur të gjitha procedurat ligjore, deri në dërgimin për miratim në Kuvendin e Komunës;
– U formua Komisioni prej tre anëtarëve për Revidimin e Projektit të Fabrikës për Përpunimin e Ujit të Ujësjellësit Qendror për 15 fshatra;
– U obligua Drejtoria e Urbanizmit që, në bashkëpunim me DKRS-në, të fillojnë urgjentisht procedurat për hartimin e projektit për renovimin e Muzeut dhe Bibliotekës në qytezën e Dragashit;
– U obligua Drejtoria e Urbanizmit që të fillojë procedurat për renovimin e ish-objektit të DKA-së dhe objektit të Komunës;
– U obligua Drejtoria e Urbanizmit që të shqyrtojë dhe të marrë një vendim lidhur me Kërkesën e Hidroregjionit Jugor për ndarjen e një trualli prej 10 ari, për nevojat e Njësisë së Hidroregjionit në Dragash;
– U obliguan të gjitha drejtoritë përkatëse që të bëjnë evidentimin e aseteve komunale jashtë përdorimit, në mënyrë që të fillojnë procedurat për hapjen e ankandit publik për shitjen e tyre.
