Sot, së bashku me Kryeministrin në detyrë z. Albin Kurti dhe Ministrin e Kulturës, Rinisë dhe Sportit, Hajrullah Çeku, përcollëm nga afër ecurinë e punimeve në ndërtimin e Qendrës Multifunksionale në Dragash. Ky investim në vlerë prej 1 milion euro është ideuar, projektuar dhe kërkuar nga Komuna e Dragashit. Gjithashtu, edhe parcela është ofruar nga Komuna. Projekti financohet nga MKRS-ja.
Ky është një hap i rëndësishëm drejt krijimit të një hapësire moderne dhe funksionale në shërbim të qytetarëve tanë.
Falënderoj për bashkëpunimin Kryeministrin Albin Kurti, ministrin e MKRS-së, Hajrullah Çeku, dhe ish-Sekretarin e Përgjithshëm të MKRS-së, Xheladin Krasniqi.
Është për t’u habitur dhe për keqardhje që, në njoftimin e tyre publik për vizitën e sotme të Kryeministrit Kurti, ku së bashku përcollëm këto punime, Qendra e Vetëvendosjes në Dragash, kanë larguar fotografitë e përbashkëta, duke krijuar një narrativë të njëanshme që nuk i shërben as transparencës, as korrektësisë publike. Kjo qasje nuk i kontribuon bashkëpunimit institucional dhe as respektit ndaj qytetarëve, të cilët meritojnë informim të saktë dhe të plotë për projektet që realizohen në komunën tonë.
