Në kuadër të Agjendës për nder të Epopesë së UÇK-së, sot në sallën e Asamblesë Komunale u mbajt Seancë Solemne, ku morën pjesë përfaqësues të ekzekutivit dhe legjislativit lokal, familjarë të dëshmorëve, përfaqësues të veteranëve dhe invalidëve të luftës, përfaqësues të institucioneve të sigurisë, institucioneve fetare, arsimore, partive politike, media dhe qytetarë.
Në fjalën e saj para të pranishmëve, Kryesuesja Skeraj tha se asnjëherë nuk do të mungojë nderimi dhe mirënjohja jonë e thellë, si dhe përulja para veprës dhe sakrificës heroike të Familjes Jashari në krye me Komandantin Legjendar Adem Jashari, duke shtuar se do t’i kujtojmë me nder dhe respekt të gjithë ushtarët dhe dëshmorët e rënë për idealet e lirisë dhe pavarësisë, si dhe të gjithë veteranët e Luftës të cilët sakrifikuan gjithçka që ne sot të jetojmë të lirë dhe ta kemi shtetin tonë pavarur.
Kryetari Xheladini tha se Epopeja e UÇK-së shënon kulmin e heroizmit dhe sakrificës së popullit të Kosovës për liri. Ai theksoi se kjo ditë është një kujtim i përjetshëm për të gjithë ata që dhanë jetën dhe vuajtën për ta realizuar ëndrrën e çdo kosovari. Kryetari Xheladini tha se Familja Jashari, në krye me Adem Jasharin, u bë sinonim i rezistencës dhe i luftës heroike, dhe se emri i tyre do të jetë përherë në kujtesën e çdo shqiptari.
Me nga një fjalë rasti të pranishmëve iu drejtuan edhe sekretari i OVL të UÇK-së, z.Salih Shala, dhe nënkryetari i Komunës nga radhët e komuniteteve, z.Fejsal Halilović.
