Kryetari i Komunës së Dragashit, z. Bexhet Xheladini, i shoqëruar nga kryesuesja e Kuvendit, znj. Arijeta Skeraj, dhe asambleisti, z.Nexhat Selaj, në kuadër të vizitës studimore që po zhvillon Asambleja Komunale, realizuan dje një vizitë në Komunën Purkersdorf, ku u pritën nga kryetari i kësaj komune, ing. Stefan Steinbichler.
Gjatë këtij takimi, i cili u zhvillua në një atmosferë miqësore, të dy delegacionet shkëmbyen informacione përkatëse mbi komunat e tyre, duke ndarë përvoja dhe praktika të mira në qeverisjen lokale. Në përmbyllje të takimit, Kryetari Xheladini e ftoi homologun e tij që, në një kohë të përshtatshme, të vizitojë Komunën e Dragashit, si dhe parashtroi idenë për mundësinë e binjakëzimit ndërmjet dy komunave.
Kryetari i Komunës së Purkersdorf, pasi falënderoi delegacionin për vizitën, deklaroi se kërkesat dhe propozimet e paraqitura do të shqyrtohen me vëmendje nga ana e tyre. Në fund të takimit, delegacioni i Komunës së Dragashit i dhuroi kryetarit të Komunës së Purkersdorf disa dhurata simbolike në shenjë mirënjohjeje dhe respekti.
