Nën udhëheqjen e kryesueses, znj.Arijeta Skeraj, Kuvendi i Komunës së Dragashit mbajti sot Mbledhjen IV (e katërt) të rregullt për vitin 2025, me këto pika të rendit të ditës:
1. Miratimi i procesverbalit nga mbledhja e kaluar;
2. Raporti për realizimin e buxhetit për periudhën janar-mars 2025;
3. Anulimi i Vendimit për financimin e shujtave ditore për nëpunësit e shërbimit civil të Administratës së Komunës së Dragashit 01 Nr.060.01-7/25 të datës 28.02.2025;
4. Shqyrtimi i kërkesës së OVL të UÇK-së për ndryshimin e datës zyrtare të çlirimit të Komunës së Dragashit, nga data 15 në 12 qershor.
5. Formimi i komisionit për verifikimin e procedurave të blerjes dhe servisimit të automjeteve të QKMF-së; dhe
6. Eventuale.
Mbledhja ishte paraparë vetëm me katër pikat e para, ndërkaq Kuvendi miratoi rendin e ditës me dy pika shtesë, të propozuara nga asambleistët Nedžmidin Sejdilar (pika e 5-të) dhe Shpetim Hajredini (pika e 6-të).
Pas miratimit të procesverbalit nga mbledhja e kaluar, në pikën e dytë të rendit të ditës Kuvendi shqyrtoi dhe miratoi me shumicë votash Raportin e Realizimit të Buxhetit për tremujorin e parë të vitit 2025.
Në pikën e tretë të rendit të ditës u votua për anulimin e Vendimit të Kuvendit për kompenzimin e shujtave për punëtorët e Administratës Komunale, i cili ishte marrë në seancën e kaluar. Për këtë çështje, shumica e asambleistëve u dakorduan që – në përputhje me përgjigjen dhe rekomandimet e Ministrisë së Financave – një vendim i tillë të merret në një seancë të radhës, pasi të bëhen planifikimet e nevojshme buxhetore për vitin e ardhshëm 2026.
Në pikën e katërt të rendit të ditës, me votat unanime të të gjithë asambleistëve të pranishëm në sallë, Kuvendi miratoi kërkesën e OVL të UÇK-së për ndryshimin e datës zyrtare të çlirimit të Komunës së Dragashit, nga data 15 në 12 qershor.
Sa i përket pikës së pestë – formimi i komisionit për verifikimin e procedurave të blerjes dhe servisimit të automjeteve të QKMF-së – nuk mori votat e mjaftueshme për miratim nga asambleistët.
Në pikën eventuale, të gjitha pyetjeve të asambleistëve në lidhje me investimet kapitale, arsimin dhe shëndetësinë, iu përgjigj kryetari i Komunës, z.Bexhet Xheladini.
