Sot, së bashku me kryesuesin e Kuvendit të Komunës dhe pjesëtarë të Kabinetit, morëm pjesë në ceremoninë përkujtimore me rastin e 27-vjetorit të rënies së rreshterit të KFOR-it Turk në Kosovë, Hüseyin Kutlu, në Dragash.
Në këtë ceremoni ishin të pranishëm edhe përfaqësues të lartë të institucioneve të Republikës së Turqisë në Kosovë, me të cilët ndamë respektin dhe nderimin për sakrificën e tij.
Hüseyin Kutlu dha jetën në shërbim të paqes, sigurisë dhe stabilitetit në Kosovë, në një periudhë të rëndësishme për vendin tonë. Sakrifica e tij mbetet pjesë e kujtesës sonë dhe një dëshmi e përkushtimit të atyre që shërbyen për paqen në Kosovë.
Në këtë përvjetor, shprehëm mirënjohjen tonë të thellë për Republikën e Turqisë dhe për pjesëtarët e KFOR-it Turk, të cilët ndër vite kanë qenë pranë qytetarëve të Kosovës dhe kanë dhënë kontribut të rëndësishëm në ruajtjen e paqes dhe sigurisë.
Miqësia dhe bashkëpunimi ndërmjet Kosovës dhe Turqisë janë vlera që i çmojmë dhe i kultivojmë me respekt të ndërsjellë.
Qoftë i përjetshëm kujtimi për Rreshterin Hüseyin Kutlu!
BEXHET XHELADINI
Kryetar i Komunës së Dragashit
