Nën udhëheqjen e Kryetarit Xheladini, Këshilli Komunal për Siguri në Bashkësi mbajti dje Mbledhjen II (e dytë) të rregullt për vitin 2025, ku u diskutuan këto pika të rendit të ditës:
- Shqyrtimi dhe miratimi i procesverbalit nga takimi i parë;
- Vlerësimi i përgjithshëm i gjendjes së sigurisë, çështjet politike dhe të sigurisë gjatë tremujorit të parë, veprimet dhe masat për luftimin e shkelësve të ligjit, si dhe masat për shkelësit e ligjit në komunikacion në Komunën e Dragashit;
- Trotuaret, lirimi i tyre dhe shenjat sinjalizuese;
- Monitorimi dhe raportimi mbi nivelin e sigurisë në shkolla dhe zbatimin e Planit për Siguri në Shkolla;
- Diskutim lidhur me paralajmërimin për mbajtjen e AROG FEST; dhe
- Të ndryshme.
Me kërkesë të anëtarëve të KKSB-së, opinionit publik dhe OVL të UÇK-së, Dega në Sharr, si pikë e veçantë e rendit të ditës u fut edhe diskutimi lidhur me paralajmërimin për mbajtjen e AROG FEST.
Bazuar në raportimet e komandantit të Stacionit Policor në Dragash, z.Shaqir Uka, dhe komandantit të Vijës Kufitare, z.Jeton Hulaj, gjendja e përgjithshme e sigurisë në territorin e Komunës sonë gjatë tremujorit të parë të këtij viti u vlerësua e qetë dhe stabile.
Sa i përket pikës së tretë të rendit të ditës, komandanti i Stacionit Policor informoi anëtarët e KKSB-së se do të merren të gjitha masat e nevojshne për sigurimin e hapësirave publike dhe lirimin e trotuareve, sidomos gjatë ditëve festave të majit, kur pritet të rritet edhe numri i mërgimtarëve nga komunitetet joshumicë të cilët vijnë për të festuar. Ai bëri thirrje që qytetarët të kenë kujdes dhe të mos parkojnë veturat e tyre nëpër trotuare, duke penguar ecjen e këmbësorëve.
Në pikën e katërt të rendit të ditës, drejtori i Arsimit, z.Zeni Krasniqi, raportoi për aktivitetet e realizuara nga DKA-ja dhe zbatimin të Planit për Siguri në Shkolla.
Në pikën e pestë të rendit të ditës, duke u bazuar në diskutimet e zhvilluara dhe analizimin e hollësishëm të rrethanave, KKSB-ja vlerësoi se eventi AROG FEST:
- Nuk përfaqëson vlerat dhe traditat kulturore të komunitetit lokal;
- Ngjall shqetësime të bazuara në përvojat historike të keqpërdorimit të festave për qëllime politike dhe propagandistike;
- Ky event planifikohet të mbahet në të njëjtën ditë me Ditën e Dëshmorëve, e cila është një datë me ndjeshmëri të veçantë kombëtare dhe historike për qytetarët e Komunës së Dragashit dhe mbarë Republikës së Kosovës;
- Rrezikon të cenojë harmoninë ndëretnike dhe stabilitetin social në Komunën tonë; dhe
- Qëllimi i mbajtjes së manifestimit AROG FEST nuk është promovimi i vlerave kulturore të komunitetit, por ka karakter profitabil.
Për të gjitha këto arsye, KKSB-ja konkludoi se manifestimi AROG FEST nuk duhet të mbahet në formën dhe datën e propozuar, duke ftuar organizatorët që të respektojnë ndjeshmërinë historike dhe kulturore të komunitetit, si dhe të bashkëpunojnë me institucionet lokale për çdo organizim të ardhshëm i cili synon promovimin e vlerave autentike të komunitetit.
Në pikën eventuale, anëtari KKSB-së, përfaqësuesi i Këshillit të Bashkësisë Islame të regjionit të Dragashit pati pyetje lidhur me njoftimet e Agjencisë Kadastrale të Kosovës për projektin e Rindërtimit të Kadastrit. Kryetari Xheladini informoi të pranishmit për marrëveshjen e bashkëpunimit ndërmjet Komunës së Dragashit dhe Agjencisë Kadastrale të Kosovës për realizimin e këtij projekti, duke njoftuar se kjo agjenci tashmë ka filluar fushatën informuese dhe në fillim të majit do të mbahen takime informuese edhe me qytetarët e Komunë sonë, ku ata do të mund të marrin më shumë informacione për këtë projekt.
