Sot ishte një ditë e veçantë për Komunën tonë, për fshatin Krushevë dhe për të gjithë qytetarët: përurimi i Qendrës së re të Mjekësisë Familjare në Krushevë. Ceremonia e përurimit u zhvillua në praninë e përfaqësuesve të lartë diplomatikë dhe ushtarakë të Republikës së Turqisë, ambasadorit, z.Sabri Tunç Angılı, konsullit të Republikës së Turqisë në Prizren, z.Celal Dogan, drejtoreshës së TIKA-s, znj.Fulya Arslan, përfaqësuesve të LMT-së dhe Këshillit të Lartë Turk, deputetëve të Kuvendit të Kosovës, znj.Duda Balje dhe z.Adem Hoxha, kryesueses së Kuvendit, znj.Arijeta Skeraj, drejtorëve komunalë, stafit shëndetësor dhe qytetarëve të shumtë.
Ndërtimi i kësaj qendre moderne është financuar nga buxheti vetanak i Komunës së Dragashit, ndërsa aparatura dhe pajisjet janë siguruar falë bashkëpunimit të shkëlqyer me Agjencinë Turke për Zhvillim dhe Bashkëpunim (TIKA). Shprehim mirënjohjen tonë të thellë për ambasadorin e Republikës së Turqisë, drejtoreshën e TIKA-s dhe të gjitha institucionet turke që veprojnë në Kosovë, për ndihmën dhe mbështetjen e vazhdueshme ndaj Komunës së Dragashit.
Përmes kësaj qendreje, ne jo vetëm që po realizojmë edhe një premtim të radhës, por po sjellim shërbime jetike më afër qytetarëve, veçanërisht për komunitetin joshumicë që jetojnë në këtë pjesë të Komunës së Dragashit.
