“Kisha kënaqësinë dhe nderin që sot, në këtë ditë historike që shënon 24 vjetorin e Çlirimit të Dragashit, përmes një ceremonie simbolike të shpreh vlerësimin dhe mirënjohjen e thellë për të gjithë ata punëtorë shumëvjeçar dhe kontributdhënës të Administratës, Arsimit dhe Shëndetësisë së Komunës së Dragashit, të cilët u pensionuan gjatë kësaj kohe.
Me punën e tyre të palodhshme dhe ushtrimin me përkushtim maksimal të profesionit të tyre, do të mbeten çdo herë shembull dhe model për gjeneratat e ardhshme. Do t’i kujtojmë përherë si punëtorë të zellshëm të administratës, arsimtarë, profesorë, mjekë e infermierë të përkushtuar, të cilët me devotshmëri dhe dinjitet i shërbyen komunitetit.
Ua urova përzemërsisht pensionimin, duke u dëshiruar shëndet të plotë dhe lumturi në çdo moment të jetës, qetësi shpirtërore dhe harmoni familjare me më të dashurit e tyre.”
BEXHET XHELADINI
Kryetar i Komunës së Dragashit
